再过两日天，就是端午日。小辰光，长到开始记事个辰光，爹爹、姆妈就会得讲畁伲听，端午节是纪念战国时代个爱国诗人，楚大夫屈原勒农历五月初五搿日投汨罗江殉国个日脚。到后首来，到学堂读仔书，历史先生也讲着仔搿桩令人肃然起敬个悲壮历史事件。
我个人大约三、四岁个辰光就开始会得记事哉。现在回想起来，搿辰光个事体还能够依稀想得出来。因为我是生勒战乱年代（1941年，当时称民国三十年）个沦陷区。普通百姓勒搿种兵荒马乱，人人自危个日脚里向，哪里还有啥个心思去过啥个节。所以，直到仔我六岁，也就是1946年（当时称民国三十五年）个辰光方始晓得过脱仔新年之后，还有个端午节！也是我记忆当中过个最隆重个端午节。
现在回想起来， 我记得，搿年伲刚刚吃脱伲姆妈为立夏日做个甜酒酿，端午节就到哉。一早起来，姆妈拿出一身新做个印仔勿勿少少小黑老虎个明黄色短衫裤，搭我着勒身上。远远叫看上去就像勒我身上披仔长老虎皮一样。搭我勒脚上先套一双白颜色个新袜，再着仔一双新个，头上用五彩丝线绣好仔虎头样子个黄布鞋。等到姆妈拿一顶虎头帽望我头上一戴，我自家马上就觉着，我就是一只威风凛凛个小老虎！我马上跑到房间里。望大厨门面上长椭圆形个穿衣镜门前一立，自我欣赏起自家搿只小老虎个神气样子来。
端午日是要吃粽子嘅。伲屋里向，姆妈搭子两个女佣人勒前两日就已经拿粽子包好哉，有白水粽、灰汤粽、赤豆粽、鲜肉粽、火腿粽。前三种侪包成三角形状个三角粽，后面个两种咸粽子包成长方形枕头样式个枕头粽。为仔弗弄错，各宗粽子用颜色丝线做好记认。我从小就勿欢喜吃甜食嘅，所以姆妈就叫人搭我剥两只咸粽子：一只鲜肉粽，一只火腿粽。我有辰光也会吃点甜个物事嘅。粽子，甜个里向，我比较欢喜吃灰汤粽。糯米经过碱水浸一浸之后，烧出来个粽子颜色就泛灰绿色。搿种粽子吃起来是了粽子表面刷上液态个糖油嘅，吃起来个香甜味道别有一个。而白水粽、赤豆粽一般是一边蘸砂糖一边吃嘅，但是我吃白水粽、赤豆粽个辰光侪是勿蘸糖个白吃。包咸味粽子个米侪要用红烧肉个汤汁拌过，所以味道特别鲜美。
端午搿日，大人要吃雄黄酒。据说雄黄酒可以避开五毒侵扰。伲小干儿是勿吃酒嘅，搿末用啥个办法来避开五毒呢？勒大人吃雄黄酒之前，大人会拿出一种用雄黄化出来个黄颜色个雄黄浓汁来，用毛笔蘸仔搿种雄黄浓汁，勒小干儿个额骨头上画一个“王”字。大人厾说，只要小干儿额骨头上画仔搿个“王”字，蛇虫百脚等五毒只要一看见小干儿腭骨头上搿个“王”字，俚厾就勿敢近小干个身，来咬倷哉。
走到街上，我还看见有个小人身上还挂仔只用彩色丝线编织个网袋装个大咸鹅蛋，有个小人胸前挂一串五彩小粽子。不过搿种粽子勿是吃个，使用硬纸条折成功三角个粽子形状，外面绕仔各种颜色个丝线，然后连成一串。搿种装饰粽子串有个是五只一串，有个是七只一串，有个是大小划一，有个是大小勿一连成宝塔形式。每个五彩粽子串侪勒最底下装出长短勿一个彩色流苏来。搿种粽子串挂勒胸口头，走起路来一抖一抖，一晃一晃，来得个好看。
因为穿过伲黄埭个搿条河个水面勿阔，顶多只能畁两只小船并排通行，所以勒伲黄埭街上从来朆有过比赛划龙船个活动。不过我记得，搿年四乡八里个老百姓为仔庆祝沦陷地区各光复，倒是来仔一转自发个摇快船游行：我记得每只船侪披红挂彩装扮得喜气洋洋，每只船个船艄上侪挂仔双橹，橹搒绳旁边出仔跳，每条橹搒绳上侪是两个人，一个人立勒跳上，一个人立勒船里，两个人一上一下一道出力里外扭搒，只船行得来得个快。领头个船上还有人敲锣打鼓，一路行来热热闹闹。大人立勒桥面上，伲搿班小干儿就扒勒桥栏杆上看闹猛。