“中秋”，也称为“仲秋”。大约勒浪二十四节气格“秋分”前后。也就是天文节令格“秋季”格中心时间。据说，每年格中秋节，也就是阴历（或称“农历”）格八月十五，是一年当中月亮最大，最圆格日脚。因此“中秋节”也就成仔中国人传统格“团圆节”。不过勒民间还有一种说法，叫做“十五格月亮十六圆”。当然，箇个“十五”、“十六”也侪是阴历格日脚。也就是说，阴历十六格月亮要比月半（十五）格月亮还要圆。
既然叫“中秋”为“节”，箇末应该是要过节嘅。所谓“过节”，也就是说一定有一种过中秋节格庆典仪式。非常遗憾格是我已经想勿起过中秋节庆典仪式格具体情形哉。我只隐隐约约记得，我小辰光有一年格中秋节，伲爹爹姆妈勒天井里摆仔一张八仙桌，台子朝南格一面系好仔红颜色格桌围，台子浪摆好仔香炉、蜡钎。台面浪除脱仔月饼之外也有几样荤素菜肴。等到垂夜快，开始点起香烛，进行祭祀。祭祀结束，方才可以吃夜饭。吃过仔夜饭以后，就是赏月。
中秋赏月是中秋节格一个重要节目。到阴历八月半箇日，吃过仔夜饭，家家屋里格大人侪会带仔自家格小干出来，到开阔格广场上、大园子里，或者桥面浪去看亦是大亦是圆格中秋明月从东面地平线浪慢慢交升起来，随着月亮渐渐升高，圆月也会得从大而慢慢交缩小，俚格颜色也会得从一开始升起辰光格黄里透红，到逐渐变成皎洁、雪白而耀眼。我记得，爹爹指牢仔月亮浪阴影，讲畁伲听，月亮里有称为“广寒宫”格“月宫”，还有住勒月宫里格嫦娥，有一只红眼白毛格玉兔一直陪勒俚身边，勒月宫里还有一棵开满木犀花格桂花树，有一个名叫“吴刚”格人一直守勒桂花树格旁边看牢树浪箇些木犀花，俚有辰光会采仔木犀花做桂花酒。还会拿“嫦娥奔月”格神话故事讲畁伲听。
其实，对伲小干儿来说，过中秋最有吸引力格也就是有得吃。中秋时节吃格物事当中，最值得回忆格，无非是月饼。伲苏州人吃格月饼称为苏式月饼。根据月饼当中酿格勿同，有枣泥月饼、豆沙月饼、五仁月饼等等，不过箇种月饼侪是我勿大欢喜吃格甜味格月饼，我最欢喜吃格月饼侪勿是箇种甜味格月饼，而是现做现卖，味道咸格鲜肉月饼。因为鲜肉酿数量有限，如果肉酿用完之后，做月饼格油酥还有多余，店家就会用多余格油酥做两种副产品：袜底酥、水花饼。袜底酥稍微有点甜味，水花饼个味道也是咸嘅。所以箇两种月饼格副产品我也是蛮欢喜吃嘅，特别是水花饼，小巧玲珑，一口一个。自从我离开黄埭之后，箇两种物事我还朆吃着过。
中秋时节个吃食物事，除脱仔月饼、袜底酥、水花饼之外，勒苏州还有菱（水红菱、馄饨菱、四角菱、乌菱、沙角菱），塘藕，芋艿，再晚一点还有鸡头米，荸荠，慈姑等水产品。
水红菱，因为外皮是玫瑰红色，而且吃起来感觉水分特别多，所以叫做水红菱。水红菱就是中秋时节个一种时鲜水果，上市格辰光短，前后大约只有十来日，错过仔箇段辰光，倷就是出再高价钿也呒不场化去买嘅。俚格特点就是鲜、嫩。嫩到菱壳用指甲就能够掐破，吃勒嘴里味道鲜甜，呒不一点点肉渣嘅。箇种水红菱，我勒南京、无锡侪朆看见过，可能还是伲苏州格一种特产唻。
馄饨菱，是一种呒不尖角格菱格品种，俗称“和尚菱”。熟吃比生吃好，所以一定要等俚长老以后方才可以采摘。箇种和尚菱还可以做叫叫来吹。拿和尚菱做叫叫也是我经常白相格一桩趣事。做起来，先要拿菱外头格一层皮撕脱，然后勒菱壳格中间搭子菱屁股浪各戳一个洞洞眼，拿菱肉挖出来，剩一只菱格空壳，勒菱屁股格洞洞眼浪贴一片竹衣。实梗，一只菱叫叫就做好哉，就可以放勒嘴浪吹起来。
四角菱，无锡出格比苏州格好，所以也称“无锡菱”。生得嫩格可以生吃，生得老格就要烧熟仔熟吃。四角菱格产量勒苏州、无锡比较大，一直要买到上海得唻。
乌菱，是一种个体比较大，壳也比较厚格菱格品种，上市得比较晚，大约是勒中秋前后方才有得卖。生格辰光菱皮是暗紫红格颜色，烧熟仔颜色变成深灰黑色，所以称之为“乌菱”。乌菱格灵肉吃勿出甜味，而且也比较粗，所以侪是熟吃嘅。
沙角菱，大概是一种野生格菱，个头小，卖相难看，剥除来格菱肉也只有一点点大。现在可能已经看勿见哉。不过我还要劝大家一声，熟格菱肉虽然好吃，但是勿宜多吃，吃坏仔肚皮是木补药吃嘅！所以有句俗话，叫做“菱吃伤，呒药方”。
我记得，中秋时节，勒苏州格市场浪，有得卖一种叫做“塘藕”格藕，外貌雪白粉嫩，伲苏州人买转来，拿俚勒清水里汏一汏，再拿只竹筷格方头，拿藕皮刮一刮，切成功薄片，拿来生吃。箇种塘藕吃勒嘴里个感觉是，亦是鲜嫩，亦是香甜，而且还呒不渣渣。按照中医格说法，藕勿但可以解渴，还有通气格功效。
桂花糖芋艿，是中秋时节苏州人喜爱格一样大众食品，我小辰光还有一些小商贩挑仔担，走街串巷叫卖“桂花糖芋艿”。芋艿好吃，但是弄起来是蛮费工夫嘅。先要拿一只只芋艿汏干净，拿外头箇层皮刮干净，大只头芋艿还要减减刀，切成差勿多格块，再放勒镬子里烧，烧到挨模样，再加糖焖烧，最后加桂花酱。为仔省火，烧芋艿格辰光可以放点点口碱。伲屋里向因为人多，要吃桂花糖芋艿箇辰光，大多侪是自家烧。生格芋艿刮皮，手会觉着奇痒难耐，止痒格办法是手勒火浪向烘一烘。其实防止手痒个办法还有：刮皮格辰光手浪戴一副厚格布手套，还可以先勒水里烧开再去皮就勿会觉着手痒哉。
荸荠格吃法，勒中秋时节，一般侪是削皮生吃。勒摊子浪还有一种名为“椠光荸荠”格荸荠串卖。箇是摊贩拿汏干净格荸荠用小刀呢皮削干净，然后拿一根竹籤串起来，泡勒清水里。然后一串一串格卖畁人吃。荸荠还有一种吃法，是拿荸荠勒通风格场化放一段辰光，让水分蒸发脱一部分，苏州人就称箇种荸荠为“风干荸荠”。伲勒黄埭格辰光，屋里向格门窗侪是木格子格明瓦。所谓“明瓦”，其实就是经过打磨格薄格蚌壳。做风干荸荠末，只要拿一只只荸荠放勒明瓦门窗格木格子浪，辰光一长，荸荠里向格水分蒸发托一部分以后，荸荠格皮就会皱缩起来哉。箇辰光再拿来吃，因为水分格蒸发，荸荠格皮搭荸荠格肉自然就分开哉，剥起皮来也容易勿少。而且荸荠里向格糖分也就多哉，吃起来也要觉着甜一点得唻。荸荠也可以烧熟仔熟吃。我记得大年三十个年夜饭里，每人格饭碗浪侪会放一只熟荸荠嘅。
慈姑可以做各种菜肴。还有一种称为“慈姑片”格副食，可以当茶食吃。吃法是慈姑汏干净以后，切成薄片，稍微风干，然后勒油里氽，氽好仔之后蘸椒盐吃。箇种慈姑片勒我小辰光，黄埭格糖果店里有得卖嘅。后来伲屋里搬到仔南京以后就朆看见过歇。不过我曾经自家尝试做仔畁爹爹吃过，爹爹吃仔曾经称赞我做格慈姑片味道还勿差。