今朝呢是评弹知识讲座个第六讲，说表——之一，由 廖望 供稿。
评弹呢又叫说书，主要呢就是用口语来表达书情。所以呢说表是评弹个主要手段，而口语呢是评弹塑造艺术形象个主要材料。离开了说表呢其它个手势、表情、弹唱等侪呒不办法表达完整个心情，塑造完整个人物形象。评弹所用个口语呢也弗同于一般日常生活个语言。一般日常生活个语言呢往往是比较粗糙，自然形态个啦，有种么繁琐，有种么还有点直，就是弗哪哼顺啦。而评弹所用个语言呢，是一种进过提炼加工个艺术语言。俚呢是比较精炼、正确、生动搭富裕形象性。现在呢我伲先请大家听一段《玄都求雨》钱笃招出场个一段表，由 刘天韵 讲：
[录音片段]
（评弹）刚巧刘天韵搿个一段表啦就拿钱笃招哪能出场就表出来则。评弹是通过说表来描写人物、叙述情节，勒听众个头脑里向引起各种想像搭仔联想那么产生艺术形象。评弹个说表呢，弗受时间空间个限制，是比较灵活自由。那么再经过历代一人个丰富、加工，除了用说书人个口气来叙述意外呢，再增加了书里向人物个道白。 说书人个叙述呢一般是用第三人称，搿么书里向人物个道白呢一般侪用第一人称。再由此化出来各种说白。评弹一人呢称之为六白。哪亨六白呢，就是官白、私白、咕白、表白、衬白、托白搿个六白。官白呢，就是脚色主里向讲个闲话，搿种官白呢有时啦是从昆曲啦或者京剧当中吸收过来个中州韵，有时呢也用苏白，或者呢各地个方言。譬如像《玄都求雨》当中就有实梗一段官白，搿么再请听搿段录音：
[录音片段]
方才放个一段呢就是府台用个中州韵，其他个脚色呢就是用个苏白。苏白呢是通过说书人个嘴里向说出来个脚色个内心独 白。譬如像杨振雄说个《西厢记·闹柬》当中就有莺莺小姐格一段私白，现在也请听一听录音：
[录音片段]
那么搿段私白呢是用第一人称个角度来体现莺莺小姐个内心活动。咕白呢就是脚色出声搭弗出声个独白。出声个呢叫官咕白，就是官白个咕白。弗出声个呢，就是肚皮里转念头个啦，叫私咕白，私白个咕白。表白呢就一般指说书人对书情个叙述搭介绍包括啥个时间、地点、条件、过程等等。衬白是补官白、私白唱片弗足个地方、弗能说明个场化搭仔解释。托白呢用来加强语气，强调某一句闲话个。说表呢有搿状多种角度、多种方式、就赛过像画画实梗有各种用笔、用墨个技法，或者拉提琴搿实梗有各种指法、工法一样，就能够塑造艺术形象，并且呢使得艺术形象更具有广度搭仔深度显得栩栩如生。下头呢就请大家听一段吴子安说个平话《隋唐》里向个《捉鹦哥》个一段录音：
[录音片段]
搿个一段 《捉鹦哥》呢基本浪用个侪是表叙，勒表叙当中也夹有艺人个评述搭仔代问代答。搿个勒说书当中成为长表段。搿段长表段当中呢又运用了各种手法，各种角度，就弗同于一般个说故事，形象生动，听起来呢就有立体感。评弹艺人就运用了搿种灵活、自由个说表就可以突破时间个限制，拿情节个来龙去脉交代清楚，以增加书请个说服力并且增强听众听书个兴趣。搿种交代个来龙去脉个手法呢，勒评弹里向称之为“故去重谈”搭“未来先说”。搿么哪亨叫“未来先说”呢？就请蒋月泉当场做一段“未来先说”个说明：哦，热吹潽烫（形容刚出炉的、新鲜的意思），当场来做一段了！试试看啊，弗知啊切弗切。
【搿个叫“未来先说”啦，就是朱小溪，豆腐店老板朱小溪，得着仔个儿子转来么一家人家弄得连遭颠沛。等到小囡卖畀了徐上珍 ，卖脱以后呢，那么俚叫“未来先说”哉。 朱小溪呢有仔一百五十两银呢看毛病么毛病好，豆腐店么开起来双开间。哦，生意好哉，一早晨要两百多黄板哉。那么老板娘娘么火着个辰光么烧脱个眉毛了啊，眉毛一出么夫妻亦要好哉。哀歇仔像煞觉着搿个肚皮大哉，俚 当仔鼓胀了。去看医生一看么，倒说，喊俚有喜哉。老板娘娘想哪亨还会有喜呢，覅吓脱个啊。后首来倒居然养（即“生”）哉。那么说俚命宫里向呢儿子么是呒不个。后来养个囡儿（苏州话“儿”读作ny或ng），等到囡儿一大么，搭俚配亲，配勒关浪，浒墅关。（“浒”在这个地名里读shiu ）。搿个女婿畀勒搿朱小溪看中。情愿用气力弗情愿用铜钿个。做生活（即“工作、任务”）把急（即“做事卖力”），名字叫阿水泾，搿阿水泾呢做豆腐呢做弗过老丈人。做两块豆腐干炒炒笃，所以搿个关浪豆腐干呢就是阿水泾赛过去做个。那么后首来么一代一代传下去么，朱家里有子孙。搿个叫“未来先说”。】
该个赛过朱小溪个命运，俚真正摆了《玉蜻蜓》里说完仔《厅堂夺子》下来倷再去介绍呢，人家覅听哉。听客转去睏觉哉，老早 。所以扳要摆勒搿个一道，等到卖脱儿子之后，那么表搿个一段，叫“未来先说”。那么因为听客欢喜听，觉着俚后首来弗晓得哪亨啘。哦，下头实梗个结局个，起搿个一个作用。 那么，俚还有故典了，关浪豆腐干实梗种名堂了。搿个叫“未来先说”。还有种方法叫“过去重谈”。搿桩事体过脱了，重新再来提。搿么由请蒋月泉热吹潽烫个再来一来，过去重谈吧。蛮好啘，横竖横（形容豁出去的意思）哉啘。
【就是徐元宰详诗句。诗句一详呢俚晓得徐家里老夫妻弗是俚个爷娘，爷（是）金贵升，娘（是）一个出家人，法名叫智贞。那么俚想哉，想个些儿（些与儿连读若“新”）侪是过去个事体。想八岁个辰光第一次到金家里，问金大娘娘来借贷，一进墙门，看门格个周青对我只面孔一看啦，一吓呀，一跤跟斗。丫头、娘姨赛过排人弄堂。我勒浪人弄堂里过来么，搿种人对我面孔一看么侪喊“像”。我当场想“我哥鼻头弗长么，哪哼侪喊我象个呢？”到厅堂浪见金大娘娘是出色，叫啥看俚立勒浪，两只眼睛激出仔，像两只汤团，喉咙口“几诟几诟”，看见仔我只面孔闲话侪讲弗出。后来哭进去个。可见得我只面孔是像该搭个东家金贵升。搿么再想到金大娘娘俚廿七岁个辰光生病，我搿辰光十一岁，倒听见庵堂俚个三师太智贞勒探病哉。搿辰光金大娘娘是我继娘，喊我扶梯头浪代俚接一接，三师太抬起头来看见我，听见我个声音么，对我只面孔一看么，倒喊一吓呀。“吓。。。。。”“吓”个一声，我想哪哼我实梗大个蟹呒不个啘。看上去俚实头认得金贵升，因为我只面孔像金贵升。哦哟，搿个一想倒一定到庵堂俚向去一趟。】
那，搿个一段说书就叫“过去重谈”。那么俚因为个事体是过脱了，过脱仔重新再回忆表出来了叫“过去重谈”。所以搿个评弹啦，搭一切文艺一样个，最主要个就是要写人。优秀个评弹呢就是非常注重刻画人物。所以评弹个说表个作用弗只是勒浪交代时间、地点、人物、外形等等，而更主要个在于刻画人物个思想感情。就是刚巧放个杨振雄说个《闹柬》里向个一段莺莺个内心独白啦就是发挥了评弹运用说表刻画人物个思想感情个特长。那么又是刚巧蒋月泉介绍个两段物事。一段是介绍朱小溪，俚个归宿，俚个结果。一段是讲徐元宰想起三师太为啥道理看见我要吓，因为我个面孔像金贵升。“过去重谈”也是讲刻画人物个感情。那么今朝个评弹只是讲座就讲到此地，因为说表啦是评弹个主要手段，勒下一期评弹个知识讲座里向呢，我伲 还要继续向听众们来讲几种弗同风格个说表艺术。我相信大家呢一定会得有兴趣个。评弹知识讲座谢谢诸位收听。