仁官，是我大阿哥个小名，俚呐比我大五岁。平常辰光，有俚自家个一班白相淘伴。学堂里放仔学，阿哥总归会搭仔俚个一班白相淘伴约好仔一淘出去白相，弗大愿意带仔自家个兄弟姐妹一淘出去白相嘅。不过，闲话要说转来，伲阿哥也弗是从来勿带伲一淘出去白相嘅。勒我脑子里影响最深个也有过弗少次。
暑假里，夜幕降临，像伲阿哥实梗年纪个一班大小倌，有个辰光也会得带仔伲搿班小小倌一淘白相一种叫“官兵捉强盗”个游戏。大家事先就已经约好仔啥辰光了啥场化集中。屋里有电筒嘅，手里拿好仔电筒。等人头到齐，大小倌、小小倌拆一分为二，一半大小倌带仔一个小小倌，弟兄淘里总归会分勒一淘嘅。所以白相搿种游戏，我总归跟牢仔伲阿哥。
人头分派定当，两方面各推举一个大小倌做头头，由两个带头人用“猜东猜”个方法来决定哪 （ 读作 [lo] 洛，疑问词。下同 ） 个一方当官兵，哪个一方当强盗。按照一般个规则，“猜东猜” ，就是现在个小人也拆欢喜用来决输赢个“石头剪刀布”猜拳游戏。“猜东猜”也像一般个游戏比赛，以 三局两胜 决定输赢。赢个 一方就当 “ 官兵 ”，输脱个一方就当 “ 强盗 ” 。
游戏开始之后，当 “ 强盗 ” 个一方先自家寻壁壁角角弗容易畀别人寻着个场化叛 （ 躲藏 ） 起来，叛个辰光长短是事先规定好嘅。等辰光一到，当“官兵”一方个领头人已发出指令，就三三两两，开亮仔手里葛电筒来寻，畀“ 官兵 ” 寻出来个“ 强盗 ” 只要还朆畀对方捉牢，还可以逃跑， “官兵”就勒后头追。 箇个辰光，可以看见伲箇班大大小小个小干儿（读作 [ng] 鱼）三三两两满街个大呼小叫，奔来奔去。 直到当 “ 强盗 ” 个一方所有人侪畀“ 官兵 ” 一方捉牢 就 算 游戏结束 。
假使游戏继续进行， 两方面个角色对调，也就是原来 扮“ 官兵 ” 个一方改扮做“ 强盗 ” ，原来 “ 强盗 ”个一方掉转来改扮 “ 官兵 ” 。有辰光，一盘游戏结束，下一盘游戏开始之前，两方面个头头再用“猜东猜”定输赢个办法来决定哪方当强盗或者官兵。
我小格辰光，黄埭，箇个场化小得真可以称得上是个弹丸之地 了 。 整条街浪 呒不高楼大厦 ，最高个要算西横头黄埭中学后头大操场浪个一座瞭望用个碉堡哉 。一条黄埭河贯穿全镇，拿个黄埭分成上塘、下塘两个部分。上塘一条街，街路两边大小商铺林立，文化娱乐场所间插其间，下塘也有一条断续而不规则个街，临河一侧差勿多侪是石驳岸，另一侧则大多搭旷野、农田相连，零散分布着 几家 工厂、手工业作坊，外来人口勒下塘相对比较集中。上塘搭下塘之间从东到西有庙桥、新黄埭桥、芳桥、中市桥、香花侨 等五 座桥梁通连，伲屋里向就勒芳桥堍笡对面。 从最东横头格庙桥到最西横头格香花侨，总共也只不过三里路。伲白相“官兵捉强盗”游戏个范围一般侪勒新黄埭桥到中市桥之间上、下塘两条街个范围以内。白相箇种“官兵捉强盗”格游戏侪是男小倌，一场游戏白相下来，个个侪是大汗淋漓，浑身侪是汗酸臭味。身浪个衣裳全部湿透，就像勒雨头里沰（读作 [toh ] 厾）过个一样。下晚昼个浴赛过朆淴，上床睏觉以前要末再淴一次浴，要末拿浑身上下好好交揩一揩，拿身浪个汗酸臭味揩脱仔才好让伲到床浪去睏觉！
倷啊曾看见过 “ 鬼火 ” ？绿悠悠个火光，勒空旷个野田爿里飘来荡去个就是 “ 鬼火 ” ，我看见过，也就是跟仔伲阿哥，搭俚个一斑大小倌一淘白相个辰光，勒野田爿里看见过嘅！现在，读过书个人，呒不哪个弗晓得， “ 鬼火 ” 实际朗是漂浮勒空气当中个磷元素，搭流动个空气之间发生磨擦以后产生自燃个一种自然现象。记得也是一年个暑假里向，一日吃过仔夜饭，大大小小个小倌儿搭往常一样，由箇里向个大小干带仔一淘白相。里向有一个搭伲阿哥一样大个，名叫元熙个阿哥，对伲箇班小小倌说，今朝带恁笃到野田爿里去看鬼火。恁笃勿怕就跟伲一淘去。啥人胆小，勿敢去，箇末倷现在自家先转去，覅跟牢仔伲！
其实，箇辰光，各班大大小小个小倌儿跟牢仔俚，已经走过芳桥，穿过仔芳桥下塘个一条屎坑弄，聚集勒埭基坟个空地浪哉。四面是墨黜黑个一片野田爿，再说伲老早听大人说过，各条屎坑弄个式坑棚里曾经吊杀过人！倷想，箇辰光还有哪个小倌再敢离开箇班大小倌，自家一干子转去呢？只好自家壮壮胆，答应一声： “ 伲侪弗怕！ ” 大家跟牢仔俚笃。倷几个小小倌小手相搀，夹勒大小倌个当中，沿只能一个人走个田岸，一直望西，沿路还有几搭乱葬岗，一直走到西横头个香花弄外个空地浪。天气闷热加上心理恐惧，你已经走得满头大汗淋漓嘅哉。就勒搿辰光，只听见一阵 “ 啪啪 ” 声从身后划空而过，一个小小倌下的 “ 哇 —— ” 个 一声大哭起来。听见有人一哭，我个心里也虚落落起来，马上我个两只小手抓紧仔自家个阿哥。阿哥说： “ 呒啥吓头，刚刚飞过去个不过是只野鸡而已！ ” 听仔自家阿哥个劝慰，我也弗怕哉。不过，箇日子个夜里，伲搭仔箇班大小倌一淘真个看见仔勒野田爿里飘来荡去，颜色绿悠悠个 “ 鬼火 ” 。