风筝，又名纸鸢。勒苏州人个嘴里称鹞子。鹞，是鹰个别称。鹰有非常高超个飞翔能力，鹰弗仅飞得高，能飞得很远。鹰张开翨 { 革羽 } （读作 [ji 基kaq 甲 ] ，翅膀）定勒浪弗动个样子，就像放飞个风筝一样。我想苏州人大概就是因为实梗个原因，所以称风筝为“鹞子”。
每年过农历个新年，或吃过元宵节个汤团以后，一直到清明，是放鹞子个最好时节。勒搿个时节，只要天空晴朗，抬头仰望，蔚蓝个天际侪是大大小小个鹞子，有蝴蝶、有蝌蚪、有百脚、有圆月、有菱形、六角形、八角形……各种各样，不一而足。
记得，黄埭街河渎桥个东堍，有一爿名叫“永康”个老字号酱油店。搿爿店是黄埭街浪最大，也是牌子最老个，专门做油（食用油）、盐、酱、醋、各种腌制酱小菜个店铺。俚个后头也就是酿造酱油搭腌制各种各样酱小菜个作坊。俚笃店里有一只百脚（“蜈蚣”勒苏州、无锡、上海一带个俗名）鹞，每年到箇个辰光，就会勒后头个作坊里放上天去。箇条大“百脚”放上天仔之后，一直要登勒天浪几十日天，过仔放鹞子个季节后，方始收转来，到来年再拿出来放。
勒箇段辰光里，黄埭街浪、附近乡下头个人，老远就可以看见一条活灵活现个红头“大百脚”勒天浪悠悠佼个游动，每日天到垂夜块个辰光，还会搭百脚鹞挂一盏灯笼。就是天完全黑下来仔之后，方圆几里路之内个人就能看见天浪箇条“百脚”散射着幽幽个淡黄色光芒。箇条“百脚”勒箇个时节，就是黄埭街浪一道特有个风景！
我听说，“永康酱园”箇只大“百脚”年年放上天，已经放仔弗少年数哉。百脚鹞除百脚个头以外，百脚个身体是用一只只个月亮鹞串联起来做成功嘅，不过是月亮个两旁边各伸出一根竹梗梗，竹梗头浪再扎上一束鸡毛算是百脚个脚。听说箇只百脚鹞非常巨大，作为身体个每一只“月亮”，就像人家屋里个圆台面一样大！放箇只鹞子用个麻绳也是特制嘅，大约有小人个手指头实梗粗。放箇只鹞子上天，差弗多酱园里几十个职工要全体出动！
芳桥下塘搿块名叫“埭基坟”个场化，是一片大约有半亩地大笑个空地，东面四分之一突起，高出西侧个平地一尺半到两尺，高墩墩顶浪也老早变仔一片平地哉。埭基坟东面二十公尺开外是一条小河浜，南面、西面是一淌平洋，侪是个连片麦田、菜地。只有北面是一条踏出来个便道，沿便道北面有一廗（读 [da 大 ] ）顾姓人家后院个围墙。箇搭视野开阔，行动方便，就是伲黄埭街浪人放鹞子天生个最好场化。每到放鹞子个时节，从早到夜，放鹞子个人络绎弗绝，下晚（该搭读 [mei 煤 ] ）昼人最多，碰着礼拜日，人多得轧弗落。搿辰光，后来个人，也回到西偏南三四十公尺开外个一小块名叫“长坟”个高墩墩浪去放鹞子。
我只要一有空就会跑到埭基坟浪去看别人放鹞子，有辰光也会得搭搭下手，拿鹞子往天上送一送；或者帮别人个忙，绕绕放鹞子个线、或绳之类。一经想要自家也能够有一只鹞子，最好是蝴蝶样子个鹞子。当然也想着过自家动手做一只蝴蝶鹞，虽然我也晓得做鹞子需要点啥个物事，但是呒不人教我哪亨做鹞子，尤其是做鹞子个辰光要掌握个窍门，否则做好仔也放弗上天嘅。
有一日天下晚昼，阿哥带仔我到西横头俚个同学，景辉阿哥笃屋里去白相。据说两家人家还是世交，伲爹爹搭景辉阿哥个爹爹也是蛮要好个朋友，两个老人家也常常勒一淘聚会、听书、看戏。一到俚笃屋里，只见客厅个墙头浪挂着几只鹞子，有蝴蝶形、八角形。俚呐勒浪搭一只差弗多像一个小倌儿（该搭个“儿”读作[ng 五 ]） 实梗大个大蝴蝶形鹞子糊纸头。我就凑上去，叫仔俚一声：“景辉阿哥，倷会扎鹞子嘅啊？倷啊好教教我吤？我也想搭自家做一只蝴蝶个鹞子。”
“做鹞子末，倷现在还小，用刀削竹头蛮危险嘅，一个弗巧，就会削勒倷自家个手浪向嘅！等倷再大一点，我再教倷，啊好？”景辉阿哥默默我个头，对我说，“倷想要只鹞子么，弗难嘅，倷看，我墙头浪挂勒浪个箇点鹞子里向，倷看中哪只，我就拿俚送畀倷。啊好？”
我一听里个闲话，心里向是满心欢喜，开心得弗得了，面露笑容，点点头，说：“啊是真个吤？倷无能骗我嘅啊！”我故意加上一句，拿箇桩事体敲敲实。
“我啥辰光骗过歇倷？倷说，倷想要哪只鹞子？我现在就去拿丫杈来探畀倷！”景辉阿哥说。
我马上用手指指墙头浪箇只“蝴蝶”，说：“我就想要箇只‘蝴蝶’！倷啊肯拿俚送畀我？”
“好。”景辉阿哥说，“我马上探畀倷。”话音刚落，俚就到后面拿仔只丫杈来，拿墙头浪向个箇只蝴蝶鹞探仔下来。说：“等歇恁厾转去个辰光，我来交畀倷阿哥，让俚呐来搭倷拿转去。”
“好个。谢谢，谢谢倷。”我马上说。
勒景辉阿哥屋里白相仔歇之后，就回头仔俚厾大人，说要回转去哉。景辉阿哥拿只蝴蝶鹞交畀伲阿哥个辰光，交代我：“箇只鹞子比较大，方鹞子个绳弗能忒细，起码要用扎制点个麻线。弗然绳子一断，鹞子要飞脱吤！”“喔，晓得哉！”我答应一声，伲弟兄两家头亦谢仔俚一声。俚让伲阿哥拿勒手浪。伲阿哥拎仔只鹞子对我说：“那是好哉，倷转去仔夜里向个觉也睏弗着嘅哉！”我笑咪咪嘅弗响，高高兴兴个跟勒俚后头，望自家屋里转去。
自家有仔只称心如意个鹞子之后，就一心想拿出去放。第二日，我就开始为放鹞子做各种准备。
我先问姆妈：“伲屋里啊有放鹞子个麻线？”
“屋里哪搭来麻线吤！”姆妈说，“要末到麻线店里去买啘。”我就嬲牢胶仔姆妈要去买麻线。姆妈畀我嬲得呒不办法，只好答应。勒伲屋里搭西面。隔开五六间门面远个六房墙门口，有爿专门卖麻线、麻布（俗称“夏布”）个店铺。姆妈搀仔我，就勒箇爿麻线店里买仔两绞麻线畀我。姆妈叮嘱仔我几句：“我麻线么买畀倷，箇只鹞子实梗大，倷一个人放箇只鹞子吃弗住吤！倷一家头弗能去放吤。要放，一定要搭阿哥一道去。啊晓得？”
我虽然嘴里答应，心里恨弗得马上就到埭基坟朗去，拿箇只鹞子放到天浪去！
回到屋里，亦问姆妈拿仔根竹筷 儿（读作 [ng 五 ] ，下同） 。我先拿两绞麻线拆开来、绕成两团。先拿一团麻线个一头勒筷浪绕几圈系系 （勒苏州白话里读作 [ji 结 ] ，下同） 牢，那末再用绕“ 8 ”字法，拿箇两绞麻线侪绕到箇根竹筷浪。勒浪即将绕完个辰光，搭另一个麻线团个头接起来，等到拆绕道筷浪，箇些麻线勒箇根竹筷浪就像一粒大橄榄，竹筷勒麻线两头还露出大约摸一寸长个光景。我实梗个绕法也是勒浪做别人帮手个辰光学得来嘅。因为我看人家实梗绕起来个绳，勒浪放鹞子辰光，放线、收线侪蛮方便。
亦过仔两日天，一经等弗着伲阿哥个人，心里放鹞子个念头实在熬弗牢哉，一日下晚昼，学堂只有一节课，刚一下课，我连忙拿书本、簿子、铅笔盒望书包里一塞。先生千脚跨出课堂个门槛，我拿书包望肩胛浪一掼，后脚也就跟仔出去。一出课堂们，直奔校门外，一路快跑。 ? （ ？ 读作 [zia 斜 ] ，疾速奔跑）到屋里，书包望茶几浪一厾。一只手里拎好仔只鹞子，一只手浪拿好仔放鹞子个麻线，拔脚就往埭基坟浪跑去。
到埭基坟浪一看，还好，放鹞子个人弗多，蓝蓝个天浪只有七八只鹞子，准备要放飞个鹞子，连我在内，也只不过三四只。地浪，放鹞子个搭来看热闹个人，加起来总共也弗满廿个。再一看，别人个鹞子大多数侪是箇种勒摊头浪有得卖个，普通棉纱线就可以放起来个，像“瓦爿”一样四四方方个小鹞子。相比起来，我手里箇只“蝴蝶”亦是大亦是漂亮，非常抢眼，大家侪勒浪对我手里箇只鹞子相。
一看实梗个情形，我觉着心里来得个得意。我先跑到东面高墩墩浪，寻仔一块比较大个空地，拿放鹞子个麻线搭鹞子浪个根千斤总绳系牢。一只手拿好仔麻线团，一只手拎好仔搭鹞子系好的麻线，想一家头来放箇只蝴蝶鹞。就勒箇个辰光，我远远叫看见一经勒一淘白相个个圆圆立勒浪俚屋里个后门口。俚比我大几岁，我个手对俚一招，俚就跑到我们前。说：“倷也来放鹞子啊。箇只蝴蝶真漂亮！那搭来嘅吤？”
我说：“伲阿哥个同学送畀我嘅。倷呒不啥事体么过来帮我个忙，啊好？搭我一淘拿箇只蝴蝶放上去！”“好嘅啘（可以连读作‘呱’）。”俚答应一声。
因为吹个是东风，所以俚接过我手里箇团麻线以后，你两家头一淘跑到最西面。俚让我拿仔鹞子立勒一丈开外个西面，拿鹞子往天浪擉（读作 [zoq 蜀 ] ，送；射）。只听俚一声“放！”，我就拿鹞子用力望上一擉，跟仔俚一淘往东面奔跑，一面奔一面放线，直跑出去两三丈，只见箇只鹞子摇摇晃晃往天浪直窜。箇团麻线交还畀我个辰光，俚教我两只手一定要拿牢麻线团两头个筷儿，线要慢慢交放，要放放停停。我接过麻线，只觉着两只手浪分量重得吃弗消。我只得马上招呼圆圆，赶快过来帮忙。俚过来捏牢我拿筷儿个两只手，两个人一淘扳牢仔鹞子个麻线，一步一步退缩着往东面个高墩墩浪走过去。一面走一面放线。放线个辰光，鹞子会往下头沉，个辰光，放线个手就要停下来，腾出只手来，扳扳牵鹞子个绳，箇只鹞子就往天浪升。鹞子一往上升，就再拿线放出去。线一放，鹞子就落，鹞子一落，再停手扳扳手里个鹞绳，扳几扳，鹞子再上升。就实梗反反复复，放放停停，只看见箇只“蝴蝶”鹞子越放越远，越放越高，也越来越小。我只觉着两只手浪个分量也越来越重，往高墩墩浪走起来，脚浪个步子越来越吃力。也只有一歇歇个辰光，筷儿浪个麻线侪放光哉。
两家头走到高墩墩浪，勒草地浪坐下来，放鹞子个成功，我个心里乐滋滋，个外开心。圆圆告诉我，勒鹞子浪绑一张鹞弓，鹞子放到天浪去仔之后，鹞子还会发出“嗡嗡”个响声。俚还答应做一张送畀我。俚搭我白相“搭鹞子送饭”：就是拿一张纸头，戳一个洞，穿到放鹞子个绳浪，稍微抖抖鹞绳，各张纸头就会沿着鹞绳往上升，可以一直升到鹞子门前。后来，俚教我：拿系麻线个筷儿插勒泥地浪，弗必要一经守勒旁边嘅，腾出身体来还可以白相别个物事。我一想实梗也弗错，我让俚帮仔我拿筷儿插勒泥地里，一直插到系麻线个场化碰着地面，差弗多有半根筷儿深。为仔保险起见，我勒碰着地面个麻线浪再压仔半块砖头。
就勒箇辰光，原来个东风突然转仔偏北风，我箇只蝴蝶鹞也从西面转到仔偏南面个方向，鹞子转方向个辰光，乐天空浪翻仔几个跟斗。我问圆圆哪亨弄法，只见里走过来。拿筷儿从泥地里拔出来，对我说：“先收一收鹞绳，等鹞子平稳下来再放线。”俚拉麻线，拿线收转来，叫我拿收转来个先绕勒筷儿浪。等仔歇，鹞子了偏南面个天空浪稳定仔下来。
“现在可以放线哉！”圆圆对我说。俚马上亦帮仔我拿麻线重新侪放出去，等到麻线放完，拿筷儿勒原先插筷儿个洞洞眼里插好，还用原先箇半块砖头压好勒线浪。俚立起身来到别人搭，看别人放一只弗大个老鹰形状个鹞子。我也想跟过去看，勒我立起身来个辰光，因为勒地浪孵（读作 [bu 匍 ] ，蹲）个辰光忒长，脚里发麻，起身辰光有点立脚弗稳，去碰着仔插勒地浪个竹筷，筷儿畀鹞子个麻线从泥地里袋子出来，我一把呒不抢着，鹞子连麻线带仔根竹筷马上往南面飞出去。我一面喊：“圆圆，鹞子飞脱哉，豪 {} 帮我追！”一面跟仔鹞子吠陀个方向跑，圆圆听见我箇叫喊，也追仔过来，俚比我跑得快，几步就已经超过我，伸手去抓鹞绳搭筷儿，但是，箇根离地面最近个筷儿畀鹞子拖着一直朝前飞，越飞越快，越拖越高。转眼之间，连鹞子影子已经完全看弗见哉。圆圆追过仔几块麦田也终于朆追着，只好气喘咻咻垂头丧气个跑转来安慰我。
是我自家个疏忽，眼睁睁个看着自家心爱个“蝴蝶”费的无影无踪。我心里难过至极，但是却欲哭无泪，回转屋里怕别人埋怨所以只好瞒牢仔弗讲。直到现在，想着箇桩事体，心里还勒浪懊悔。也就是箇种悔恨个滋味，使我写箇只故事个最后几段个辰光，弗快活个心情一直让我呒不办发快速写成，只好写写停停，拖拖拉拉仔好几日方才完成。