毛豆荚（苏州白话读作 [tce 吉 ] ）干、笋豆、盐金豆，是伲小辰光屋里弗断个自备零碎食。每日天下晚昼（苏州白话读作 [gho 夏 mai 蛮 tsou 州 ] ，下午），学堂里放仔夜学，回到屋里姆妈看见仔伲，第一句就会问：“肚皮啊饿？”然后就勒专门放零碎食个果子桶里抓一把毛豆荚干，传畀伲。让伲一面做功课，一面吃毛豆荚干。有转把，伲也会主动提出来：“姆妈，毛豆荚干啊有嘞呀？”只要听见姆妈肯定个答复，就会自家用小手到果子桶里搲两把毛豆荚干，塞勒自家个衣裳袋袋里，慢慢交剥来吃。
我小辰光，伲屋里每年到入秋，乡下个毛豆田侪要拔毛豆箕，改种别个物事个时节，也就是到毛豆要下市个时节，因为箇辰光个毛豆价钿已经跌到仔最低。伲姆妈就会到街浪拿乡下人卖个毛豆一担一担个买转来。然后叫人拣一拣，留下豆粒饱满个毛豆荚，到河滩浪汏干净，稍微沥沥干水，倒进大镬子里用水加盐烧熟。用笊篱那烧熟个毛豆荚从镬子里撩出来，勒大个 匾 里摊开，放到屋面浪向，勒太阳头里晒干。伲屋里每年晒个毛豆荚干，差弗多箇种三尺头个大 匾 ，足足要摊满两大 匾 。等到毛豆荚晒干个辰光，两 匾 就剩一 匾 哉。箇个一 匾 收 转来，大个果子桶揿揿实质放满仔一桶还多，多出来个再放勒一只小一点个果子桶里。小桶里个就是畀伲勒平时辰光拿来吃嘅。小桶里吃脱仔，姆妈会拿大桶里个毛豆荚干放点到小桶里。姆妈始终弗会让伲自家到大桶里向去搲毛豆荚干吃嘅，实梗一来，大桶里个毛豆荚干大部分就能够留到过年辰光作为新年礼物拿出来畀伲吃。
毛豆荚干是整个毛豆荚烧出来嘅，吃个辰光，要先拿毛豆荚剥脱，剥出来个毛豆呈茶褐色，皱起个毛豆皮浪显出一个个大小不一个弗规则多边形。放到嘴里，舌头舔着咸微微，牙齿咬上去韧纠纠，越嚼越香，等到吞咽个辰光回味起来，还有一丝丝甜津津个味道，真是让人越吃越想吃。实梗好吃个物事爹爹姆妈畀伲吃嘅晨光真是毫不犹豫，我从朆看见俚笃自家吃一荚！伲自家从来弗晓得拿剥出来送到爷娘个嘴里。后来从老屋里黄埭搬出来到仔苏州隔几年里向，因为条件个限制，姆妈就朆晒过毛豆荚干。搬到南京来仔个几十年当中，大概只晒仔一两转毛豆荚干，而且数量浪也弗如从前实梗多哉。想起往事，真想再回到童年时代去过箇种无忧无虑孩童生活！
勒浪呒不毛豆个季节，屋里常备零碎食，勒春天春笋上市个辰光，姆妈会得做好点笋豆，作为伲下昼里放仔夜学个零碎食。笋豆而勒既呒不笋亦呒不毛豆个时节，姆妈烧个盐金豆就是伲个零碎食。盐金豆侪弗是用新鲜个毛豆做嘅，而是用干个黄豆做嘅。
笋豆，顾名思义，原料当中一定是有笋，有豆。做笋豆，其中个笋使馆件个原料。做笋豆个笋是一种名叫“大园笋”个细而长个笋，箇种笋个竹头是用来做 ? 衣裳竹头嘅。箇种竹头个笋只有勒春天有得买，而且上市个季节弗长，所以做笋豆是要受到大园笋上市季节辰光个限制嘅。
笋豆香气扑鼻，吃起来软硬适中，咸个里向海带一点点甜个滋味，味道十分鲜美，既可以当早晨头个吃粥小菜，也可以空口当零碎食吃白相。也是我小个辰光特别欢喜吃个物事。常常是一面晒，伲箇辈小人也一面偷来吃，往往是等到晒到要收个辰光，大匾里向只剩得一半哉。
做笋豆嘅大园笋，因为是春笋，勒浪烧笋豆之前，拿剥脱笋壳个笋要先切成条状，然后勒烧开个滚水里 ? 一 ? ，去脱一点春笋个苦涩味。少笋豆个辰光要重新换水，放进掏干净个黄豆，勒镬子里放满仔水一淘先烧，等到水烧滚仔以后再加盐、酿造个黄豆酱油、糖、五香八角等各种调味个作料，接着再勒灶膛里添柴继续焖烧，一直要烧到镬子里个水份全部收干个辰光为止。勒烧个辰光要经常用镬铲翻动笋豆，特别是到仔镬子里个水份就要收干个辰光，一方面要停止添柴，减小灶膛里个火头，一方面还要弗停个翻动镬子里个物事，防止笋豆烧焦。等到灶膛里个火隐脱之后，再焖脱一歇。然后拿镬子里个笋豆盛出来，摊勒大匾里，放到太阳头里晒，晒到七八成干个辰光就要拿笋豆收转来，放到有盖个罐头里存放起来。箇只罐头个笋豆顶多也就只能畀伲吃一个月个辰光，要想再吃，箇末就要等到来年 个春天到仔再做 哉。
盐金豆，做起来随意性比较大，因为原料简单，亦弗受时间、季节等条件限制，所以一年四季随便哪一日侪可以炒来吃。盐金豆实际郎就是一种盐水炒个黄豆，关键是要拿盐水炒干。炒好个盐金豆表面豆皮是皱个，还带一层盐霜。吃起来弗硬弗软，蛮有吃头嘅。除脱籽畀伲当零碎食吃之外，也可以拿俚得来当吃粥个小菜吃。
其实勒伲黄埭还有一种曾经勒外国个博览会浪得过奖个中外闻名个特色食品：黄埭（水炒）西瓜子。瓜子壳亦是薄亦是脆，原汁原味，非常好吃。不过我朆学会吃瓜子个本事，弗会像别人实梗瓜子放到嘴里一咬两半爿，舌头一舔，瓜子肉留勒嘴里，吐出来个是两半爿瓜子壳。我就呒不箇种吃完整瓜子肉吐两半爿瓜子壳个本事。瓜子放到我个嘴里，总归是一咬瓜子变得粉碎，瓜子壳搭仔瓜子肉混勒一搭堆，要末连肉带壳一淘吃进肚皮里，要末拿咬碎瓜子连肉带壳统统侪吐出来。随意一直到现在，我看见仔细瓜子就一点也呒不兴趣。我个物会吃西瓜子，曾经引得弗少人侪说我根本弗像黄埭人 。不过我个几个姊妹倒侪是吃西瓜资个好手，俚厾能够一次放十几粒西瓜子勒嘴里，一阵“咔咔”声响过后，吐出来个侪是两半爿个瓜子壳！