我记得，我小个辰光，大人笃拿农历七月初七称做“巧日”。还听伲爹爹姆妈告诉我，每年阴历个七月初七，是传说当中畀王母娘娘拆散个一对恩爱夫妻——牛郎、织女，通过“鹊桥”相会个日脚。而且说：每到箇个一日，天浪就看弗见有喜鹊飞个身影，也听弗见喜鹊个叫声。说是因为勒箇个一日，天下所有个喜鹊侪飞到天浪箇条银河浪向去搭桥去哉，搭好仔鹊桥让牛郎、织女勒鹊桥浪相会。现在也有人拿农历七月初七箇日称为中国个“情人节”。
每年个阴历七月初七，侪勒浪立过仔秋以后，但是仍旧还勒浪还朆开学个暑假里向，箇个辰光两三场秋雨之后，盛夏个暑热已经有所收敛，然而凉气还朆降临，清澄而蔚蓝色个天际，漂浮着洁白个云朵，正是一派秋高气爽个景象。
“乞巧”，就是勒实梗一种天气个“巧日”里盛行于民间个一项传统个民俗民风活动。不过，勒我个记忆当中，箇项民俗活动个主角主要是女性，尤其是未成年女性和女小人。当然也会有看热闹个男人搭仔欢喜凑热闹个男小倌参与。到仔阴历七月初七箇日个中浪向（中午时分），掇一只方凳或者小台子到太阳头里，勒凳子或者台子当中放一只盛有大半碗“阴阳水”个碗，所谓“阴阳水”，就是说箇只碗里向个水是用一半河水搭一半井水镶起来个水。
“乞巧”呐，就是拿一根绣花针放勒箇碗水个水面浪，箇个动作称为“厾巧”。当然，说么说“厾”，是弗可以真正拿绣花针厾了阴阳水里嘅，因为钢铁比水重，绣花针真正厾到水里，一定会立刻沉到碗底浪嘅。所以“厾巧”是要厾个人拿箇根绣花针轻轻佼，平平稳稳个放到箇只碗个水面浪去嘅。只有实梗，箇根绣花针才会漂勒箇只碗个水面浪。箇是一桩轻巧而细心个事体，所以也只有女性比较适宜。我小辰光也去凑过热闹，但是厾十转倒有八转箇根针侪是沉到碗底下嘅。
勒“厾巧”成功仔之后，就要看太阳投射下来，照到碗浪，箇支绣花针勒碗底浪形成个黑影像啥个物事？婉底浪向黑影，有辰光像一支“笔”，有辰光像一根“棒锤（苏州白话读作‘蒲柱’，就是过去到河滩头浪汏衣裳辰光，用来捶打衣服个木棒。也可以拿来打人）”，也有像“刀剑”形状嘅，等等。箇是因为钢针经过人个手指接触，钢针表面就会留下来人手指头浪皮肤所分泌个油脂，油脂勒水面浪搭水是互相排斥嘅，所以水搭针个接触面会受到表面油脂个影响，以至于也影响到箇根针投到碗底浪个黑影形状个变化。箇种变化还会随着拿箇根针个人数个增加而使得黑影个形状变化多端。然后，再根据碗底浪黑影个形状，推断厾巧人是聪明还是愚笨。我想用弗着我多作解释，读者一定能够猜得出判断个结果嘅。
我小辰光，每逢“巧日”，爹爹姆妈还会教伲看天浪个“巧云”。所谓“巧云”，就是天浪漂浮个白色云朵看上去像某样物事，譬如，一匹奔跑个骏马；一只弯角个绵羊；一只刚刚睏醒个狮子；一只下山觅食猛虎；……。当然，箇侪是平看个人个想像。而且箇种“巧云”勒天空浪漂浮向前个过程当中还会出现变化，譬如，马变成羊；羊变狗等等。
现在回忆起来，勒伲小个辰光，黄埭箇个小场化，除脱仔有数个几爿规模弗大个面粉厂、一家榨油个作坊、一家作麦芽糖个糖坊、一家家庭染布作坊之外，几乎呒不产生环境污染个工业企业。所以，箇辰光望出去，天，总归是蓝个。只要是晴朗个天气，抬头望天，天浪总归是蓝天漂浮着白云。但是现在就弗对哉，蓝颜色个天空已经几乎看弗见哉，望出去只有灰蒙蒙个一片。黄埭河里向个河水，也总归一年四季侪可以清澈见底，箇条河里个水完全可以满足镇浪个老百姓饮用。讲究一点个大人家屋里向还有井，俚厾吃就用井水，汏物事就到河滩头浪去。我勒上个世纪七十年代中后期、八十年代中期，曾经先后两次到过黄埭。当时辰光，我看见黄埭河里个水是黑个，同时还散发出阵阵臭味。因为来去匆匆，我呒不辰光去深入了解，箇辰光黄埭人吃个是啥个水，用个亦是啥个水？