评弹《描金凤》选段

为了便于广大网友了解评弹，体会苏州话的方言魅力。我伲在此精选了一些评弹片段（时长3分钟左右），并将视频中对应的文字写于网页下方，供大家参考。
****新开小栏目，诺大家有任何需求，请于我站EMAIL联系，谢谢。

叫旗牌官豪𢜶点去，请仙人出来，谈谈说说，弄点点心畀俚吃吃，到天亮（囔末）请俚上台。旗牌官要紧过来，桃花门关勒浪。
"TAI，开门，"嘭！
钱笃苕勒浪吃得酒水糊涂，听见碰门，心勒发荡呀。一看末两个小道士浪打瞌{目充}。
"小道士啊，小道士啊，醒醒"
"仙人啊，作啥啊，问倷"
"外头有人勒浪碰门"
"呒不人碰门啘"
"啥个呒不人碰门，仙人轮指阴阳算出来就要碰快哉"
"真个啊？"
"开门"嘭！
"喔唷。"
"啊是个啊是个……"
"嘿嘿，实头是个喏，我去开门喔"
小道士过来开门一看末，四个旗牌。箇末蛮好，说"等一等喔，我马上请仙人"，回到里向。
"仙人啊，畀倷猜着，实头是个"
"啥人啊"
"外来四个旗牌呀"
"四只蹄髈？统吃"
"啥个四个蹄髈，四个旗牌老爷"
"旗牌啊？！""哎~"
"要请我去上则啘"
"请倷去求雨哉"
"上末就是烧勒咯，"
"说得出个来，倷有本事末求下雨做官，囔烧呢。"
钱笃苕想随便吧，总归模竖横。不过求雨末要像个求雨个样子。对自家身浪一看。
"小娘儿啊，"
"哎，仙人啊"
"我要问尔笃师傅啊，借几样物事"
"啥物事倷讲嬢，借啥啦"
"头浪向借一顶莲花冠"
"莲花冠？"
"身浪向借一件大个法衣，还要借一块朝板。"
"朝板？"
"仙人朝将啊侪要派用场个"
"呃"，僵哉。小道士转念头，衣裳、帽子侪好拿旧个，朝板伲师傅侪是出价个，象牙朝板呀，看倷该种腔调弗像求得落雨啘，等歇要烧个啊，拿箇象牙朝板烧脱师傅覅骂我个啊。实梗，弄块木头个弄弄则啘。
"我去则啊！"
"小道士啊慢慢较，朝板要末覅借，要借借象牙个啊，倷想拿块木头个畀我，啊对？"
"倷囔晓得嗄？"
"仙人法眼啊，看到倷骨里得来"
"喔唷唷，箇是真正好孛相个，看得出个诺，箇末去拿则喔"
借好物事到里向，仙人啊，来哉来哉来哉""
头浪向桃巾去脱，莲花冠一戴，自家衣裳弗脱了，就拿件法衣一罩。
"朝板，实头象牙个"，
"小道士啊，"
"喔唷，仙人啊"
"倷看啊登样啦，"
"喔唷，着实啘，人要衣装佛要金装啘，实梗一来性倷看着实登样"
"喂，仙人啊，我倒想问声倷看"
"问点啥？"
"倷哪哼再晓得今朝初三要落雨则嗄？"
"倷问俚作啥啦？"
"我想学点本事"
"年纪轻轻要学本事，仙人欢迎个"
"真个啊？"
"我确保收""我讲畀倷听""不过倷外头……"