苏州话不仅仅是一种市民语言，也是一种文学语言。因此苏州话也是能登大雅之堂的，评弹就是一个最好的例证。这里我们选了一篇文章，就是用苏州话朗读的。原名《旁白》，根据内容，暂定为《江南个水》。

****************************************************************************

从洪荒流出来，流过漆发纹身先民个独木船底。流过水踏渡，流过石驳岸，流过平民生活，流出仔红尘中一等富贵风流之地。水，有桃红柳绿，粉墙黛瓦，小桥玲珑，还有带桂花香个一串月亮。落雨天看看，是流动个水晶。天好看看，是流动个琥珀。弗管落雨天好，侪可以看见江南个灵魂。吴侬软语因为软么，好听。软得像苏州小桥下头春天个水花。苏州人讲闲话，就讲究个声调，软糯。为仔软糯，一个字用勒弗同个场化，就用弗同个声调。赛过水，放了弗同个家什里，随风就圆。苏州人哪怕吵相骂个声音，也赛过苏州小桥下头春天个流水。

岸边个杨柳，挂起一道烟雾个酒旗。河水醒哉，一跃而起，玲珑得醉人。小石桥月亮形的桥洞，搭游客一淘干杯。闹闹猛猛个马路旁边，亦高亦大个烽火山墙里，囥拢一片游离红尘个山林。山，比真山还要真个假山。林，是名贵个古木搭仔奇花异草。滞留于小桥楼前，亭台楼阁，池塘，金井鱼。黑地白字个水雕石。白底黑字个牌匾。移一步，换一景。如果传得来一两声洞箫个声音，真个弄弗清爽自家是啥个朝代个人。

江南是一个谜谜子字典。每一块城砖，每一幢宝塔，每一舵太湖石，每一只井栏圈，每一座石坊楼，侪是记载历史个谜谜子。有个已经猜出来哉，有个有点牵强附会，有个仍旧神秘。从吴越春秋猜到唐宋元明清，可以猜一生一世。

****************************************************************************

注释：文章选自广东星文化传播有限公司发行《江南印象》专辑之《忆江南》（广东音像出版社出版ISRC CN-F18-05-827-00/A.J6）文章原名《旁白》，由吴中区评弹团张建珍老师朗读。