评弹知识讲座呢，是由廖望同志供稿，是弗定期个。请听众们听了以后呢，也可以提出指正个意见。

评弹呢，是平话搭弹词个总称，是苏州地方曲艺。苏州人叫说书。搿么搿说书到底是啥人创造个呢？搿倒呒不精确个史料查考哉。但是可以肯定，搿是劳动人民创造个。鲁迅先生勒一篇文章里讲到，“人勒劳动辰光呢用唱歌来作为自家个娱乐忘记劳动个辛苦”。休息辰光黏俚也要寻一种方法来消遣。就是互相讲故事。说搿种讲故事呢就是写小说个起源。

搿么讲故事呢更加是说书个起源。搿么苏州说书到底是啥辰光开始个呢？根据清朝初年，书坊店里出版，用苏州方言写个弹词脚本来看，大概是勒明末清初个辰光就有了苏州说书。评话，苏州人叫“说大书”，因为俚讲个大多数是国家大事或者是侠义公案书，开封比较大，所以叫“大书”，伲先放一段录音。 

[录音片段]

那么该个就是 张鸿声 同志讲个，一段《英烈》里向个片段，就是说大书个气派。搿么弹词呢，苏州人叫“说小书”。因为俚讲个侪是家庭恋爱故事或者么还夹桩把冤案个故事勒嗨，俚个情节细腻，缠绵，所以叫“小书”。现在请听一段录音，是 朱雪琴 、 郭彬卿 个唱段。

[录音片段]

清朝乾隆年间呢，出了一个大响档，叫 王周士 。乾隆皇帝下江南到苏州城个辰光呢，苏州地方官啦，推荐王周士到乾隆皇帝门前去说书。那么要见驾啦，见驾辰光弗能带帽子个。乾隆皇帝一看么，叫啥王周士个骷郎头一根头发也没有，是个瘌痢头。而且搿瘌痢头个颜色呢，发紫个，叫紫癞痢。倒不是山东白癞痢。乾隆皇帝呢，赏一顶帽子畀俚，让俚戴了帽子说书。那么乾隆皇帝赏个帽子搿里向有官眼个，顶顶起码是个七品小京官个苗头。还赐一个蒲团畀俚。因为立勒嗨弗好说个啦，坐了蒲团啷么说书。俚个艺术好。乾隆皇帝交关欣赏。后来回北京么拿俚带到京里。那么京里向搿点公卿大夫么侪搭 王周士有往来。但是王周士呢俚弗忘记苏州，俚觉着搿个苏州闲话说书啊，还是要回到苏州去。那么俚推就有毛病勒，告老还乡。后来回到苏州之后么，有一对棚灯，有几个红字，叫御前弹唱。哦，搿个是轰动苏州嘅。是一个大响当，对伲苏州说书个地位呢，着实提高了。当时常州有个探花，是状元勒探花、榜眼个探花，叫 赵瓯北，俚写了一首诗，叫《赠说书紫鬝痢》，就是写 王周士 个搿个故事嘅。后来到嘉庆、道光年间呢，苏州出了四个响档，四大名家，叫陈、毛、余、陆。陈呢，是叫 陈遇乾 ，俚唱个曲调呢成为现在辰光个流派，叫陈调。放一段录音。

[录音片段]

搿段录音个陈调呢，就是 周云瑞 唱个《三笑》里个《笃穷》个一段陈调。那么现在书里向个，老生、老旦唱个陈调呢就是 陈遇乾创造嘅。搿么陈、毛、余、陆个毛呢，就叫毛菖佩，俞呢，叫俞秀山，陆呢是陆瑞廷 。俞秀山唱个曲调呢也成为一种流派，叫俞调。伲也放一段录音，老俞调勒。

[录音片段]

刚巧搿老俞调是 俞筱霞 唱个。那么现在搿个俞调呢，经过 朱介生 啊、 朱慧珍 啊、 杨振雄 等等弗少人个发展，成为弹词里个基本曲调。到了咸丰、同治年间呢，也出了四大名家，叫马、姚、赵、王， 就是 马如飞 、 姚士章 、 赵湘舟、 王石泉 。搿辰光说书个数目呢，更加多了。像《珍珠塔》、《描金凤》、《水浒》等等长篇书目一大批啦。艺术浪呢，也比较成熟，表演浪呢也比较全面，成为苏州地方个主要曲艺。解放之后呢，还有了中篇、短篇、开篇、演唱会等等个新个形式，书目呢也有了弗不少丰富。流派搭风格呢也有了更多个发展。苏州评弹呢成为全国曲艺当中有一定影响的一个曲种。评弹知识第一讲呢就讲到此地。

**《评弹知识讲座》由网roger_king根据网络录音整理。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。