现在呢就请听评弹讲座第五讲，由廖望同志供稿。

第五讲个名目呢叫开篇。开篇呢原来是放勒正书门前演唱，俚搭正式演唱个书目呢，勒内容浪呒不关系个，是一种附加节目。评弹呢最早啦是勒茶馆里向演出个，听书个人么可以吃茶、吃点心、吃零碎，（阿烟）搿辰光书场里蛮闹猛个。五香豆了，啥个黄莲豆了，干炒梅子，金花菜了，吃物事。那么说书呢又呒不锣鼓闹场，那么搿个一人凭一个人个喉咙要使书场里向嘈杂，罗嘈个声音静下来啊，用啥个办法呢？那么就想出来，勒正书演出之前，先拿起乐器来么，弹脱一小段。那么其他么再唱，唱一个小节目，用搿个办法让听客安静下来，然后呢再聚精会神听书。那么艺人呢，借仔搿个开篇啦，朗朗喉咙，试试嗓音。因为搿个辰光呒不啥个种定音（叫叫），弗晓得今朝个喉咙能唱到啥个程度。那么先唱只开篇呢，试试喉咙。定音定得高么，还可以打底点，定得忒底么，再（和）高点。开篇呢，所以成为叫“开”，也就是有点“开始”了、“开场”个意思。所以，最早个辰光呢对开篇要求弗高个，就是平铺直叙唱几句。

后来呢，开篇个唱词啦，比较讲究，一般是用七言为主个，俚接近唐诗。所以过去也有人称（其）为唐诗开篇。搿么开篇个作者呢，一个是演员自家，像从前个老先生马如飞阿等等侪自家写开篇个。还有种是听客，听客当中个有文化个人也写了弗少开篇。弹词开篇个题材、风格是多种多样个。有种有专门个赞颂人物个，像诸葛亮阿、李太白（阿）、岳云阿。也有呢，专门叙述故事，比方像《刀会》、《战长沙》、《杜十娘》、《林冲夜奔》、《黛玉焚稿》、《潇湘夜雨》等等。也有呢专门描绘景物个，搿只开篇里向就是唱点风景，像啥个《西湖风景》阿、《梅竹》阿等等。再有呢滑稽风趣个白话开篇，想啥个《颠倒古人》阿、啥个《螳螂做亲》，就是实梗比较有趣。那么现在呢就请听薛筱卿唱个《螳螂做亲》个片段：

[录音片段]

由于弹词曲调个发展，弹词开篇呢也逐渐成为一种能够单独演唱个节目形式。解放之后，演员们运用实梗一种短小精悍个形式编唱了迅速反应社会现实个新开篇，配合各种宣传。像《南泥湾》阿、《雷锋颂》、《一粒米》，有个演员呢根据内容对弹词唱腔呢也有所发展。现在呢就请听严雪庭唱个一只开篇叫《一粒米》个片段：

[录音片段]

开篇呢也有两个人对唱个，称为叫对唱开篇。也有个在对唱外头呢加点说白下去，又叫对白开篇。下面呢请听杨振雄、杨振言唱个对白开篇《打黄狼》：

[录音片段]

之后呢还有由四五个人共同演唱个。搿个名堂叫啥呢，借用音乐名词，叫评弹小组唱。搿种小组唱呢只是勒反应现实生活当中新题材辰光运用。用得呢也并弗多，勒听众当中比较有影响个有《向秀丽》、《红色接班人》等等。那么现在放一段呢评弹小组唱《向秀丽》：

[录音片段]

60年以后，评弹界个青年演员谱唱毛主席诗词《蝶恋花·答李淑一》，得到了成功。诗词呢也成为评弹演唱个一种形式。下面呢就请听余红仙唱个《蝶恋花》个片段：

[录音片段]

评弹知识讲座呢就讲到此地。

**《评弹知识讲座》由网roger_king根据网络录音整理。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。