自从助我出生个“老娘”拿我从阳罗王手里夺转来仔之后，因为自家个亲生姆妈个奶水弗够，我个爹爹就托人搭我寻奶奶娘。从此以后我就吃奶奶娘个奶，我先后吃过两个奶奶娘个奶，一直吃到两岁多方才断脱人奶。

我从出世以后，只有三个月大个辰光，湿气（也叫“胎毒”。现在医学浪称“小儿湿疹”）就开始发出来哉。 郎中先生（以前民间称“中医师”为“ 郎中 先生”）说，小囡个湿气是勒娘胎里积下来个度，所以也叫“胎毒”。胎毒是娘勒浪怀胎个辰光，鱼腥虾蟹吃得忒多个原因，所以说胎毒湿气是小人养出来个辰光从娘肚皮里带出来嘅。刚刚养出来个小倌侪有胎毒嘅，只不过有个多点，有个少点。为啥小囡身体里个胎毒湿气先勒头浪发呢？因为刚养个小人头顶浪个囟门还朆长好，就像门窗朆关上。小囡身体里个毒气是朝上走嘅，就从头顶浪箇个朆长好个囟门里钻出来，所以，小囡个胎毒湿气侪是从头浪朗先开始发出来嘅。

就像 郎中 先生讲个一样，我个湿气先是从头浪、面孔浪一粒一粒个发出来。一痒，我就用小手 搔 （读作“蚤”，抓），一 搔 ，就会出淂滋滋，黄啦啦个 ? （读作“滋”）水， ? 水一干，就结一个硬盖。因盖一剥，连头发也拉脱。箇种淂滋滋、黄啦啦格 ? 水亦从头皮里滋出来。小手浪搨着箇种 ? 水以后，小手摸到哪搭，就滥到哪搭，滥到哪搭，湿气就发到哪搭。慢慢交一粒变一块，一块变一摊，越（苏州话读作“亦”）生越多，直到满头满脸侪生满箇种胎毒湿气，头浪一跟头发也呒不，就像头浪长满仔疥疮，头发一根也勿长格瘌痢头一样。因为我还小，所以大家侪喊我“小瘌痢”。其实，还军弗单单“小瘌痢”一种称呼，还有人叫我“小瘌子”、“瘌痢头”、“瘌壳秃”、“瘌痋筋”、“瘌浮尸”……一直到我头浪个湿气完全好仔之后，兄弟姊妹之间一有点口角，俚笃就会实梗喊我。搿个辰光，伲爹爹、姆妈就会立勒我箇面，派俚笃个弗是。

小辰光弗懂，一直当仔自家头浪、面孔浪生个搭因为生活习惯弗好，干净龌龊弗分而生疥疮引起个瘌痢头是一样嘅，后来进仔中学，上生理卫生课浪先生一讲，方始明白，原来我个胎毒湿气，搭沾染疥癣虫后帐疥疮应起个毛发弗生格瘌痢头，勒本质浪是完全弗同嘅：胎毒湿气是国民性格病毒病，而因疥癣勿愈而造成个瘌痢是皮肤寄生虫病。

按照现代医学个说法，皮肤寄生虫病，只要改变生活习惯，注意清洁卫生，是完全可以避免个。所以 勒 现在 个社会浪，生瘌痢头个 人 基本 浪 已经 看弗见哉 。但别过，生湿疹个小倌儿，仍旧是屡见不鲜个。而且，身浪湿疹严重个小人，常常属于过敏性体质类型。如果成长过程当中，调养得弗好，就会出现另外一些过敏性格疾病。假使再得弗到重视，弗好好交个护理，有个疾病就可能伴随箇个小人个一生一世。我头浪格湿疹从三、四岁开始就逐渐消退了，但是另一种过敏性疾病却伴随仔我一生。

作者简介：
苏州黄埭人，1941年生于吴县黄埭镇，1958年7月迁居南京至今，先后就读于黄埭小学、苏州四中、南京四中，后从事房屋建筑虫害防治研究工作，爱好中外邮票、钱币收藏。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。