蟋蟀，苏州人称之为“瑞蝍 ” 。其实，要写瑞蝍，可以说，呒不哪个人可以超得过清代个蒲松龄勒《聊斋志异》箇篇《促织》里向对瑞蝍描写个箇实梗（“箇实梗”三字勒苏州闲话里常常连读成“箇长”，意思是那样）精彩而且生动。瑞蝍搭叫哥哥（即蝈蝈）、纺织娘、蝍铃子（即金铃子）、金 钟、墨铃等会鸣叫个直翅目昆虫一淘，畀古人归入可供玩赏个鸣虫类。瑞蝍除脱有宏亮鸣叫声之外，俚笃还欢喜打斗，所以古代亦称俚笃为“将军虫”。干个瑞蝍虫体还是中医个一味功效卓著个利尿中药，可医治水肿、小便不通等病症。

也因为瑞蝍格好斗习性，可以说呒不哪个男小干勿欢喜看斗瑞蝍嘅。要想看斗瑞蝍，就要到野田爿里向去捉瑞蝍。我小学个同学，广为，搭我同岁。捉瑞蝍 ， 我搭俚是最好个搭档，有辰光也会有其他同学或邻居屋里个小朋友一淘加入。因为瑞蝍发育成熟勒浪立秋以后，箇辰光仍旧还是暑假假期，所以伲大多数辰光还会带仔自家个兄弟一淘去。伲捉瑞蝍，一般总归勒下昼里。一吃好中饭，碗筷一放，嘴巴一揩，搭姆妈讲一声：“姆妈，伲出去白相咋！”

“勒外头好好佼啊，覅去打相打！也覅到河滩头去！”姆妈照例会叮嘱我几句，“看好自家个弟弟，覅只顾自家白相！”

“晓得哉！伲是去捉瑞蝍，亦弗是去捉鱼，恁笃放心末哉！”一面嘴里答应，一面拉牢仔兄弟个手，头也弗回个拔脚朝大门外飞快个跑出去 。

出去捉瑞蝍之前，总归要先勒广为笃屋里向碰头，做出发前个准备。广为笃屋里就勒芳桥下塘，离伲屋里弗远，跑过伲门口个顶芳桥，再往东转个弯，顶多早跑出十公尺个距离就到哉。

捉瑞蝍，也弗是说捉就能够捉着瑞蝍嘅。捉瑞蝍要有一套捉瑞蝍个工具： 用细个紫铜丝编起来格有柄个钟形瑞蝍罩。箇是因为对捉着个瑞蝍要求非常高，弗能出现断须（即瑞蝍头浪个丝状触角）、断枪（瑞蝍屁股浪个尾须）个伤残形象，更弗可以短少腿脚，要做到箇点，捉瑞蝍是弗能用手直接去捉嘅，一定要用瑞蝍罩去罩。捉着个瑞蝍要有装瑞蝍个家生。一般是一根或几根一头带节个细竹管筒，竹筒浪要用小锯（苏州话里读 [ke 该 ] ）子截出距离大致相等格缝来，插上随时可以抽插个铁皮或者硬纸板，拿竹管筒隔成一个个小隔间来放捉着格瑞蝍。竹管筒装满之后，还可以用纸头做成纸管来装瑞蝍。

捉瑞蝍个辰光还要有点点小个技巧。一般是静听、辨别野田爿里各种虫鸣个叫声：“嘘呖呖、嘘呖呖”个叫声，是油葫芦；“唧、唧、唧”个叫声，是棺材头，虽然也是瑞蝍个一种，但是捉着仔一看，俚个头个前端像正面看个棺材，名字就叫“棺材头”，是一定弗能去捉俚嘅，捉瑞蝍捉着棺材头是触霉头嘅；瑞蝍个叫声，差弗多侪是“瞿、瞿、瞿”个声音。仔细辨别，叫声还是有些差别嘅：叫声宏亮而弗拖泥带水个瑞蝍长得大些，身体人颜色也会得深些；叫声尖细个，是刚长出翅膀不久个瑞蝍，身体也会显得小些，颜色也稍为浅些。

听见瑞蝍叫个声音，先要辨清方向，然后循着瑞蝍发出叫声个方向一定要轻手轻脚，小心翼翼个去靠近俚。等到吃准仔场化，还弗能马上动手，先要清理周围个杂草。杂草当中有一种名叫“割人藤”个曼生草本植物，藤蔓浪满是锋利个倒刺，只要一弗当心，勒皮肤浪一揦，皮肤浪马上就是一道血印！我就会教伲兄弟哪亨拿俚拉开。等到杂草清理完毕，再拿旁边个乱石头、碎砖头厾开。清出场化以后就要捉哉，用手翻砖头或者石头辰光，为了弗惊动瑞蝍，总是轻手轻脚，小心翼翼，特别翻到最后，一手翻砖头，一手拿好瑞蝍罩，既要聚精会神，亦要眼明手快，一看见瑞蝍，马上就要用瑞蝍罩罩上去。有辰光也会碰着瑞蝍叛勒大石头底下，搿个辰光就要两个人或者几个人分工配合，有人去翻石头，有人来捉瑞蝍。有辰光，瑞蝍叛勒毛豆田里，毛豆浪常常会有会螫人个刺毛虫。因为捉瑞蝍箇辰光精神集中，常常顾弗着毛豆浪个刺毛虫，一弗当心就会畀刺毛虫螫着，螫着个场化痛得辣豁豁。

有辰光，勒野田爿里听弗见瑞蝍个叫声，我就会用吹口哨个办法模仿瑞蝍个叫声。因为瑞蝍个本性争强好胜，听见有瑞蝍个叫声，也就会一淘鸣叫起来。等周围个瑞蝍一淘叫起来以后，伲再根据俚笃个叫声去捉俚笃。

装瑞蝍个竹管筒、带个纸头做个纸管拆装满瑞蝍之后，捉瑞蝍也就告结束。因为纸管容易畀瑞蝍格“牙齿”咬破 ，畀瑞蝍逃脱，所以弗能再勒外世多耽搁，必须豪{忄叜}（读作 [hau sau 臊入声 ] 。尽快；赶快）赶转去。勒回转来个路浪，伲还会采一把瑞蝍草，准备转去仔勒斗瑞蝍个辰光做掭草用来驱赶瑞蝍。因为广为笃屋里向有弗少养瑞蝍用个瑞蝍盆搭其他各色各样用来饲养瑞蝍个器具。所以回转来也是先回到广为笃屋里。

一回到广为个屋里，广为笃姆妈会叫人端来个面盆，先让伲汏手。大家个手侪汏干净以后，勒天井里摆好一张矮台子，拿空个瑞蝍盆搬到台子浪来。养瑞蝍个盆侪是带盖个瓦盆，有高有矮，瑞蝍盆个外形有圆形、六角形、八角形等。好一点瑞蝍盆是用紫砂做嘅。考校点个紫砂盆外还有装饰图文。再考校一点个是可以畀瑞蝍保温御寒，让俚过冬个套盆。瑞蝍套盆是勒小个瑞蝍盆外头套一只大一点个盆，盆搭盆之间个空档可以填塞棉花、纸头、丝草等，来增加盆个保温效果。

先准备好几只空盆，对捉着个瑞蝍作第一次遴选。箇是先看瑞蝍啊有伤残。拿断须、断枪、缺脱一只后腿个“独脚龙”实梗个伤残虫子先淘汰脱。淘汰下来个伤残瑞蝍大部分拿来喂鸡。假使有人想要，箇末也会送一点畀俚。

对剩下来个，健康完好个瑞蝍，再进行第二次遴选。搿次个所谓遴选，实际浪就是斗瑞蝍个开始。先数一数还剩几化瑞蝍，根据瑞蝍个多少，或十只一组，或八只一组，分成几组，然后是两只一对，两只一对，让瑞蝍进行比斗。

斗瑞蝍是最精彩对人最有吸引力个辰光。拿两只瑞蝍放进一只瑞蝍盆里，两只瑞蝍之间个打斗也就开始哉。一般情况底下，瑞蝍头浪两条长长个触须会弗停个摆动，俚笃就能够感觉到对方个存在，就会自家慢慢佼靠拢。有个辰光也需要人拿瑞蝍草做个掭草，轻轻触碰瑞蝍腹部末端个尾枪，督促俚朝前爬。只要两只瑞蝍个触须一接触，两只瑞蝍就会马上变得兴奋起来，身体奋勇朝前挺，六只脚紧紧抵住瑞蝍盆底，用强大个“牙齿”咬牢对方，奋力进行像两个人摜跤一样个打斗。落败个瑞蝍就会快速逃开，打赢个就会得意个振翅鸣叫报捷。有辰光输个瑞蝍还会畀赢个只瑞蝍一直打到摜出盆外。就实梗瑞蝍一组一组淘汰，挑选出最狠个在进行下一轮个比斗。一轮一轮个优胜劣汰，最后只保留两三枝胜利者，根据特征搭俚笃封个名号：“红头将军”、“黑头大王”、“黑旋风”等等。

一般来讲，瑞蝍格个体大，力气就大，大都就会赢。然而伲曾经捉着过一只灵巧而异常勇猛个瑞蝍，倷覅看里样子小，弗起眼，但是搭比俚大个瑞蝍比起来一点也弗逊色。每当直接咬斗吃仔亏，甚至比大个瑞蝍摜出瑞蝍盆，只要拿俚重新放进盆里，箇只看看弗起眼个瑞蝍，仍旧会拼命打斗，甚至还会用迂回战术去咬对手个脚、尾枪等，直到对手放弃认输，落荒而逃，小瑞蝍便得意个鸣叫报捷。伲因此而畀俚个“常胜将军”个封号。

获胜个瑞蝍是要专门用比较好个瑞蝍盆养起来嘅，伲勒瑞蝍个盆里还要摆上一只小型水盂、一只食盂，里向加上干净个水、饭米粒或一小粒水果，畀瑞蝍吃。箇种小型水盂、食盂多为瓷质，有全白色个，也有青白花色个。有辰光，伲还会放一只有三、四厘米长，一厘米宽，两厘米高，两面留空个瓦个小房子，畀瑞蝍勒房子里睏觉。等到一切侪弄舒齐，辰光也就弗早，差弗多是觇夜快，要吃夜饭个辰光哉。我搭广为，还有俚笃爷娘回头一声，领仔伲兄弟一淘转去。

记得还有一转，九月初，新学期刚刚开学弗久，伲白相个心还朆收拢。箇辰光秋老虎天气个余威尚存，野田爿里瑞蝍个叫声此起彼落，仍旧吸引着伲。因为下晚昼（晚，读作 [me 煤]。下午）放学早，就搭广为一道讲好，放仔学直接到广为笃屋里，拿仔要用个物事，一淘去捉瑞蝍。哪里晓得，捉仔一歇，弗知弗觉之间，天倒黑下来快哉，伲两家头豪{忄叜} 往屋里赶，也顾弗得再斗瑞蝍哉，拿起自家个书包要紧转去。刚踏进屋里，只见爹爹勒直仔面孔，说：“倷放仔夜学到哪搭去嘅？”我晓得自家错哉，只好嗫嗫嚅嚅个回答；“搭同学一淘去捉瑞蝍嘅。”

“捉瑞蝍，捉瑞蝍，瑞蝍捉得来肚皮也弗晓得饿哉！箇末，倷吃瑞蝍则啘，还转来作啥啊！”爹爹说，“走过来！拿手摊勒台子浪！”

伲爹爹只面孔，平常辰光，伲弟兄姊妹侪见俚怕嘅，何况我自家犯仔错，爹爹要责罚我，心里别别跳，本来弗晓得爹爹哪亨来罚我，一听是要打手心，先是眼泪汪汪，豪 { 忄叜 } 讨饶：“下转勿敢哉，下转勿敢哉！”

伲姆妈勒旁边帮我说情：“俚已经认错讨饶哉，倷就饶俚箇转吧！覅去敲俚哉。”

“一定弗能饶嘅！敲俚两记，是让俚有点记心！”爹爹说。我一看实梗，只好缩缩试试个挨到爹爹门前，拿手放到台子浪，爹爹举起手里箇根戒尺，勒我手浪敲仔三记。让我用记牢了一条宗旨：白相弗能忘记学习！

作者简介：
苏州黄埭人，1941年生于吴县黄埭镇，1958年7月迁居南京至今，先后就读于黄埭小学、苏州四中、南京四中，后从事房屋建筑虫害防治研究工作，爱好中外邮票、钱币收藏。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。