绿豆汤，可以说是一种人人晓得个，勒夏天头里，人人侪欢喜，大家常吃个清凉败毒、消暑解渴饮品。一般个绿豆汤就只是用淘干净个绿豆加水烧煮个豆少水多，吃个辰光再加白糖，或者勒烧个辰光就直接加仔糖一淘烧。绿豆汤里还可以加点百合 （ 苏州白话读作 [an 按 ] ） ，就叫做“百合绿豆汤”。不过百合是生勒烂泥地里嘅，勒蒂里挖出来会带弗少烂泥。要放勒镬子里搭绿豆一 淘 烧之前，一定要一瓣一瓣剥下来，掐脱百合个尖，撕脱表面个一层衣，勒水里向汏（苏州白话读作 [da 大 ] ，洗 ） 干净，否则烧好个绿豆汤吃起来苦味比较重。

旧年夏天，我勒无锡碰着仔伲勒上海个大阿姐，搭俚讲起仔小辰光吃绿豆汤个桩事体。大阿姐告诉我，卖绿豆汤个人，也弗记得俚姓啥叫啥，不过大家侪晓得俚个绰号叫“牛屄阿荣”。

小辰光，我勒黄埭，每年个夏天头里，只要“牛屄阿荣”个绿豆汤担一上市，我每日天侪要勒俚个担头浪买一碗绿豆汤来吃嘅。箇辰光，全黄埭街浪只有“牛屄阿荣”箇一副卖绿豆汤个担子。俚个担头浪一面放几只放绿豆汤配料个盆子：一盆绿豆沙、一盆蒸熟个薏仁米、一盆蒸熟个糯米饭，箇个三支盆子浪哪一条汏得雪白个土白不盖好仔。担头浪还放仔一小瓶玫瑰酱、一只放白糖个罐头下头个一个放一桶用一种名叫“鬼馒头”植物果实个做出来个，切成一个个小方块个，用冰瀴个井 水浸勒浪个“凉粉”，另一个担头浪放两幢青边碗搭仔十几把白瓷个抄，一桶勒井水里结过嘅烧绿豆个冰冰瀴（ 苏州白话读作 [jin 印 ] ，冷 ） 个汤，还有一桶汏碗用个干净井水。

倷要买俚个绿豆汤，俚就勒放碗个担头浪拿只青边碗，拿一把小抄，勒每只放配料个盆子里侪挖一堵放到青边碗里，因为叫绿豆汤。所以放到青边碗里个配料也是有多有少嘅，一般总是绿豆沙最多，蒸熟个糯米搭薏仁米要少点，再勒放玫瑰酱个小平利用像扒耳（苏州白话读作 [ni 尼 ] ） 朵个“挖耳”一样个物事挖一小厾玫瑰酱，加到青边碗里，用一只竹头作个小笊篱，到放凉粉个桶里舀浅浅交一笊篱，大约十来块凉粉，从绿豆汤桶里拷一勺冰瀴个绿豆汤冲勒青边碗里，最后再加两小抄白糖。那青边碗传畀倷个辰光，乐碗里放一把白瓷个抄。

箇碗绿豆汤里个配料，按照中医个说法是侪蛮有讲究嘅：绿豆，味淡，性平，能解百毒；糯米，味微甘，性温，有补中健脾胃个功效；薏仁米，也是一种禾本科植物薏苡个种子，味淡，性平，有特别好个利尿祛湿作用；玫瑰酱，使用玫瑰花加白糖腌制出来嘅。玫瑰花就有润肤美容个功效，直到如今也有人推崇拿俚泡水当作护肤美容个饮品来经常饮用。做凉粉个“鬼馒头”，是一种桑科个能够攀缘个藤本植物，薜荔个果实，形似无花果。用俚做出来个凉粉吃勒嘴里感觉到特别爽滑。所以夏天头里吃箇种绿豆汤弗单是清凉消暑，还有健胃祛湿护肤美容等个食疗功效。

像实梗好个绿豆汤，自从我离开老家黄埭之后，直到如今，还真是从来也朆吃着过。就是登勒苏州市里个几年里向，也从来朆碰着过实梗好吃个物事。到仔南京来，南京人连听也朆听见过有实梗做个绿豆汤！现在连黄埭也呒不箇种绿豆汤卖哉。看来箇种做法个绿豆汤已经成为仔伲中国美食过去个历史哉！

作者简介：
苏州黄埭人，1941年生于吴县黄埭镇，1958年7月迁居南京至今，先后就读于黄埭小学、苏州四中、南京四中，后从事房屋建筑虫害防治研究工作，爱好中外邮票、钱币收藏。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。